CERPEN BALI Malaib Luh, Malaib...!

T

uah abesik ada jalan. Depang pianake magedi. Ne mare pianak ka pertama. Buin pidan iraga lakar ngelah pianak akude je keneh luhe. Ipian bli ne tetep care pidan. Yan pianake luh, bli dot ye dadi pragina paling kasub. Yan muani, dumadak ye dadi  muani sujati.  Kuat. Mawibawa. “.

Sutrisni ngidemang paningalanne. Sakit ulian lekadang pianakne ane kapertama enu karasayang dislagan pahane. Awakne lemet, liu anake ngorahang nglekadang pianak care mangantung bok akatih, ne jani ia muktiang padidi. Mula saja-saja atep bates idup matine.

            Pianakne kapertama lekad luh. Seken-seken ngenyudang keneh. Ngae sing med-med nolih. Kulitne barak, leh nyangling. Bok ne selem mlengis karasa makeber sutrini sabilang nepuk buah tresnane ento. Dikeneh ia, sing suud – suud nyerit. Ipun dedarin titiyang. Tepuk tiyang awak ne ngendih. Ditundunne kebat kampid keberang ditundunne, keberang ja meme jegeg.

            Karasa ngumbang sutrisni kaampehang negehin langit ane paling tegehe. Kewala, makelo-kelo ada ane ngae tangkahne nek, ada ane ngengsut, mentik cara dui di ulu hati. Makelo-kelo nyasan ngelanyingang.

Sumingkin ngemanganang. Pedih, duine ento ka ane lakar nyongket buin pidan, ngae kampid luh e uek, laut meme macepol ulung?

***

“Pidan yan pianake lekad, pastika bagia idupe bli. Mirib care ngumbang ka langit.

“Ngumbang?”

“Saja. Tiang ngipiang pianak ragane ngelah kampid.”

“Luh liunan mabalih film. Liunan maca buku dongeng”.

“Ape pelih bli ? Apa pelih tiang ngedotang pianake nyalanin idup ane luungan teken I raga?”

            Kurenane, Made Waisnawa, tuah ngwales aji kenyem. Paninngalane nolih sutrisni. Makedua saling tlektekang. Sutrisni seken-seken ngrasayang tresnan kurenane nu patuh cara dugas  matemu simalu. Ngendih mangarab-ngarab. Abedik sing ada makuang. Sing pocol ia rasane bani nglawan pangidih meme bapane Sutrisni pidan. Apang de pesan nganten teken Made Waisnawa. Mapan gegaene sing seken. Pergaulane sing beneh, tukang gambar sing laku , seniman masi tidong. “Apa kal amah mani”. Keto meme bapane Sutrisni setata ngingetang.

            Rikala belingane suba maumur kutus bulan, kurenane nyasan ngedegang rasa sayangne. Mirib masaih cara sayangne Prabu Basudewa teken Dewaki dugas ngantiyang plekadanne Kresna di tengah kerangkeng Kangsa. Tusing med-med Waisnawa nuturang ipian-ipian yen pianakne tumbuh kelih buin pidan.

“ Bli dot pianak I ragane dadi pregina, apang bli nyidaang ngambar paukudane cara pragina-pragina sane kasub pidan-pidan. Lakar ngaenang bli kanvas paling gedene. Ia lakar dadi model bline ane paling luunga”.

“Yan keto pianake apang luh lekadne. Kewala tiang dot pianak muani Bli,” Sutrisni ngemanying.

“Muani mase dadi. Lakar ajahin bli ia ngambar uli cenik. Apang dadi pelukis ane seken-seken metaksu. Kasub, pokokne seniman”.

“Diapin sing ngelah pis?”

“Bli mase sing ngelah pis, adi Luh enu demen?”

Sutrisni mendep. Da pesan nakonang petakon yan suba pada tawang pesautne.

***

            Ento tuah I pidan. Ne jani ada ne mabading. Keliwat soleh.

“Sutrisni ! Sutrisni! Luh. Bangun Luh”.

            Munyin Made Waisnawa ngae sutrisni tangkejut. Maglebug karasa awakne ulung di subane I tunian joh kaplaibang kenehne padidi. Biasane ia setata demen yan nepuk muan kurenane, nanging sasukat marebat gede aminggu ne suba liwat ia nadak  gedeg mimbuh seneb. Biasane ia nad-aksara dot sabilang ningeh munyin kurenane kisi-kisi disamping kupingne, kewala jani ia mabalik nyen sing kodag-kodag. Waisnawa suba masalin dadi anak len.

“Kenken Luh, suba keneh-kenehang Luh buin apa ane orahin bli dugas ne?”

“Apa seken-seken sing ada jalan len bli? Apa sing ada ane nyak  ngemaang nyilih?”

            “Tusing ada. Bli suba paling kema-mai. Sing ada ngemaang. Timpal-timpal bline patuh keweh idupne”.

Sutrisni tusing nyidayang nangkek yeh matane. Pidan ia sing sanget ngitungang pipis, ne jani ia seken – seken sing nyidayang makibeh ulian pipis. Diapin suba mautsaha ngirit, sairit-iritne, penghasilanne tetep kuangan dogen. Keweh ngalih pis yan tuah ngandelang ngadep gambaran. Apabuin kurenane boya je pelukis terkenal. Waisnawa paling. Stress, gambarane sayan soleh-soleh. Ne paling sidurina, ulian sisan cet ne telah, gambaran legongne nungkak sing matendas. Warnan awak praginane masi abesik, makaukud barak getih.

“Jalan to dogen ne ada jani. Sing ada len.”

“Bli seken-seken dot ngadep pianak iragane?”

            Sutrisni nengkik. Paningalanne nelik. Lengen kurnane kadembet seken-seken tekek.

            Waisnawa maanggutan. “Anake ento ngorahanng teka buin mani. Mirib buin puan mara pragat surat-suratne.

“Apa bli suba buduh? Bli las ngadep pianak Bline padidi?

“Apa luh dot iraga terusterusan idup sengsara?”

“Kewala sing kene carane bli!”

“Keneh luh e kenken? Ngidih ke meme bapan luhe? Apa luh ngengsap suba katundung!. Suba sing akuina pianak, suba ulaha cara cicing gudig!!”

Sutrisni bengong.

“Pipise ento sing anggon mayah rumah sakit dogen. Pipise ento anggon idup I raga seterusne. Pidan kenken je keneh Luhe. Pianak dadi gae. Akuda ja kal isinin bli.”

            Waisnawa magedi ngambres. Anak muani ane pidan tepukina kuat, ane sayangne kaliwat, ne jani masalin dadi anak muani getap, ulah aluh. Apa seke-seken sing ada jalan len? Singke ada anak olas nulungin nyang besik? To ngudiang kurnane sing mautsaha nanjaang gambarane ka nyen ja ane tepukina di jalan –jalan ? anak idih-idih dogen nyak nendeh ngreremih, to ngudiang kurenane milih jalan ane jeleken?

            Petengne Waisnawa masi tusing ada di sampingne. Rumah sakite rame, pasliwer munyin batis matindakan. Kupingne karasa sampetan. Sutrisni sing nyidayang ngidemang paningalanne. Tepukina pianakne pules leplep. Bibihne mungil, pipine masemu barak. Nawangke ia yan memenne jani sedeng kaliput jejeh? Kresepke ia yan buin pidan aidupan lakar sing nawang taen lekad uli selagan batis anak luh madan Ni Ketut Sutrisni?

            Di kene-kenene inget buin ia teken munyin bapane dugas pidan. Dui di ulu hatine nyasan ngedenang. Pianakne jani tusing buin tepukina makampid kebat. Tundune puyung. Kenehne elung. “ Magedi be Luh. Magedi. Kewala ingetang. Luh tusing ja pianak bapa buin. Da pesan mabalik mulih, apabuin ngusud bangken bapane. Apa ja dadine buin pidan Luh nyalanin padidi” ken eke baya ane jejehanga teken bapane? Adake ia suba kena pastu, tulah idup?

***

            Buin manine, Waisnawa teka ngajak anak muani soleh ka rumah sakit. Toris. Adane Mike, bule uli Australia. Diapin manis, kenyem muani macunguh mancung ento ngae angkihan Sutrisni menek tuun. Gedeg. Apabuin rikala pipin pianakne kacolek, nyasan ngrudug tangkahne.

            Bulene ento adung pesan matutur-tuturan, ajak kureranane. Keto masi ajak dokter lan perawate. Di kenken makejang kedek pakrikik sambilanga ngusud panakne. Ngusuhin kulit ne ane nadaksara tepukina ocem. Ilang endihanne. Suud mesuang galang. Ada apa mirib? Singke makejang suba milu ngekedaya apang pianakne seken-seken palas ngajak dewekne? Apake doktere milu maseka?

            Diapin tusing seken pascad, sutrisni kresep gigis-gigis apa ane orahanga bulene ngajak somahne. Bulene totonan tusing pegat-pegat ngorta. Ne jani nyasan –nyasan bani. Suud keto kedek bareng-bareng ajak kurnane. “She will be my next hottest dancer. Won’t she?”

            Sutrisni nekep kupingne. Dikene-kene ne ia marasa sanget jelekan teken Dewaki, jelekan teken satua-satua iluh e, raksasane boya ja kangsa, kewala kurnane padidi. Ne jani tuah abesik ne ada dikenehne. Sing ada len malaib, malaibang pianakne keken je carane. Kenken ja apang maan selah setonde pianakne seken-seken makisid kaliman bulene ento. Malaib Sutrisni . Malaib !!! palaibang ragane ke tongose ane paling singid !! Malaib cara prabu Basudewa nyelamatang Kresna.